KALIBO, Aklan — Gin-insister ni Andagao Punong Barangay Juliet Melgarejo nga nakaangkon it pag-istorya sa tunga it complainant ag mga apektadong residente sa sangka kaso it land dispute sa parte it Calachuchi Road, Bgy. Andagao, Kalibo.
Suno kana nga sa unang meeting pa eamang hay nagpaguwa eon it demand letter ukon notice to vacate ro pamilya Daroy sa 30 nga mga ginakabig nga illegal settlers.
Gintaw-an sigon ro mga raya it hasta Disyembre 31 agud nga aywan ro nasambit nga lugar.
Apang pila sa mga raya hay naghinyu bangud sa tiempo it Paskwa rason nga nakaangkon it extension nga hasta it Marso 31 it makaron nga dag-on.
Sa nasambit nga numero, 11 ro nagpamalibad nga maghalin hasta nga ko ulihi hay naging waeo eon lang.
Dugang pa ni Kapitan Melgarejo nga gintaw-an man suno kana it pamilya Daroy it kahigayunan ro mga natumod nga original occupants it eugta nga makabakae it lote sa nasambit nga property pinaagi sa pagpautang nga eubus nanda nga ginpasaeamatan.
si Andagao Punong Barangay Juliet Melgarejo
Samtang, depensa pa it kapitan sa mga nagabatikos nga owa nakita ro presensiya it mga barangay officials sa lugar ko tiempo nga ginbutangan it kurae ro property nga owa it sin-o man sa mga apektadong residente ro nagpangayo it bulig kanda.
Suno kana nga nagalikaw imaw nga maisyuhan nga nagapasilabot, dugang pa nga owa man it komosyon nga natabu.
Mag-eowas kara, tapos eon sigon ro mediation sa barangay ag nahimo eon man nanda ro andang obligasyon sa nasambit nga isyu.
Nasayuran nga owa eon nagpasaka it kaso ro pamilya Daroy agud nga owa eon it sangag.
