Kulong ro sangka eaeaki matapos nga gina-alegar nga ginboe-an it video ro sangka babaye samtang nagapaligos sa sangka boarding house sa Barangay San Fermin, Cauayan City, Isabela.
Nakilaea ro biktima nga si “May”, 44 anyos, single ag sangka private employee nga naga-istar sa boarding house it suspek nga si alyas “Boy,” residente man it nasambit nga lugar.
Base sa inisyal nga imbestigasyon, samtang hubeas nga nagapaligos ro biktima sa sueod it anang boarding house, nataeupangdan nana ro makadueuda nga bagay sa ibabaw it cabinet nga maeapit sa kisame.
Kat anang usisaon, nadiskubre nana nga raya hay sangka cellphone nga nakatutok paubos ag nakapokus kana samtang imaw hay nagapaligos ag posibleng gina-record nga owa it anang pahanugot.
Samtang, gina-obserbahan ro cellphone, nakita sigon it biktima ro alima nga may pueang singsing nga insigida nana nga nakilaea.
Insigida imaw nga nag-agto sa kaiping nga kwarto ag ginkompronta ro suspek.
Narekober halin sa suspek ro cellphone nga kapareho sa naunang nataeupangdan it biktima, ag positibo nana raya nga nakilaea pinaagi sa singsing ag peklat sa ueo it eaeaki.
Nagpangayo it bulig ro biktima sa kapulisan nga umaresto sa suspek.
Nagapangatubang ro suspek sa kasong pageabag sa Republic Act 9262 ukon Violence Against Women and Their Children (VAWC) Act.
