KALIBO, Aklan—Sa kasagsagan it mabaskog nga uean, nabaeabagan sa checkpoint sa Barangay Venturanza, Banga ro sangka bilog nga lechon nga nakataeana kunta nga iga-deliver kahapon sa sangka handaan sa nasambit nga banwa.
Suno kay Punong Barangay Jeanlyn Palmon-Yap it nasambit nga lugar nga halin sa banwa it Balete ag igahatud kunta sa sangka okasyon sa banwa it Banga ro lechon nga ginsakay sa topdown nga ginamaneho it sangka menor de edad.
Kaibahan it driver ro sangka 18 anyos nga eaeaki ag sangka unga.
Base sa ginpaguwa nga executive order ni mayor Noel Redison hugut nga ginabawae ro pagpasueod it mga karneng baboy ag processed pork products sa banwa it Banga halin sa kaiping nga banwa it Balete bangud ro lugar hay ginakabig nga infected zone it African Swine Fever ukon ASF.
Ginpahayag ni kapitan Yap nga ginpapundo ro topdown para sa inspection sa animal quarantine checkpoint apang owa eagi nagpundo ag na-intercept eon sanda sa Brgy. Tabayon.
Mag-eowas nga nag-eabag sa sueundanan kontra sa ASF, natukiban nga owa pa it nagakaigo nga lisensiya ro driver ag dokumento ro saeakyan rason nga gin impound sa Banga Municipal Police Station.
Sa presensiya it tag-ana it lechon ag iba pang mga otoridad, ginsunog ro lechon ag pagkatapos hay gin eubong.
