KALIBO, Aklan—Gin-abisuhan ni Altavas mayor Denny Refol Jr. ro anang mga pumueuyu nga magbo-oe it travel permit sa oras nga magabiyahe sa siyudad it Iloilo.
Raya hay bilang precautionary measure bangud sa nagatinaas nga kaso it coronavirus disease ukon covid-19 sa nasambit nga lugar ag pag-angkon it local transmission.
Suno kana nga ro permit hay pwedeng mabo-oe sa munisipyo, rural health unit ukon natungdan nga barangay.
Suno sigon it nasambit nga tikang nga mapadali ro contact tracing engkaso nga may ma-infect it virus sa andang pagbiyahe sa siyudad it Iloilo.
Kaibahan sa mga datus nga ginabo-oe hay ro pangaean, kaibahan nga nagbiyahe, anong oras naghalin ag ro contact number.
Nasayuran nga makaron hay nagapabilin nga covid free municipality ro Altavas.
Angot kara, gin-umpisahan eon sigon nanda ro construction it andang kaugalingon nga isolation facility ukon ligtas covid center.
