KALIBO, Aklan—Ginkumpirma it lokal nga gobyerno it Kalibo nga may nagakaigo nga permit sa Business Permits and Licensing Office ro daywang peryahan nga naga-operate sa banwa it Kalibo.
Suno kay kagawad Mark Sy it Poblaciion, Kalibo ag tagapaghambae ni Kalibo mayor Juris Sucro nga kinahang-ean anay nga makaangkon it nasambit nga permit halin sa munisipyo antes nga maka-operate.
Ginpasugtan sigon ro mga raya nga mag-operate it sang buean ag tunga ukon hasta sa Nobyembre 15, apang pwede pa sigon raya nga ma-extend hasta sa Enero it masunod nga dag-on.
Ro pahayag hay ginhimo ni Sy matapos nga mataeupangdan ro sugae nga ginapatigayon sa peryahan eabi eon sa hampang nga color games ag drop ball kun sa siin mabahuean ro pusta.
Angot kara, ginpasiguro ni Sy nga paga-usisaon it kapulisan ro lugar agud nga matumod kon may irregularidad nga nagakatabu.
Normal eon sigon nga may eakot nga kwarta sa mga pahampang sa peryahan.
Nakabaehag sigon raya sa ordinance no. 2013-001 it Kalibo nga ro peryahan hay makabig nga sangka amusement facility ag ginapasugtan ro operasyon kara nga mini-lottery.
Gindugang pa ni Mark Sy nga pagatutukan man ro mga pasaway nga menor de edad nga naga-eabag sa curfew.
