KALIBO, Aklan—Plano it lokal nga gobyerno it Kalibo nga maangkon ro Guinness World Record para sa may pinakamaabu nga drummers nga dueueungan nga magatukar sa maabot nga opening salvo it Kalibo Sto. Niño Ati-atihan Festival 2024 sa Oktobre 6 hasta 7 it makaron nga dag-on.
Suno kay sangguniang bayan member Ronald Marte, chairman it committee on tourism nga sambilog sa andang plano ni Kalibo mayor juris sucro hay ro pagtinguha nga maagaw ro titulo sa prestihiyosong Guinness World Records sa pagtililipon it pinakamaabu nga numero it mga drummers nga magatukar.
Ro presenteng nagabuyot it record hay ro United Kingdom sa pag angkon it 582 drummers nga nagtukar it dueueungan it kaparehong beat.
Kumpiyansa si SB Marte nga masarangan nanda nga mapaea ro nasambit nga record bangud sa ginatos nga mga drummers it nagkaeain-eain nga mga grupo ag tribu nga nagapasakop sa dag-unan nga festival nga ginakabig nga ‘Mother of All Philippine Festival’.
Ginpahayag dugang nga tuyo kara nga mas pang makilaea ro Kalibo Sto. Niño Ati-Atihan Festival sa bilog nga kalibutan.
Sa pihak nga parte, sa maabot nga selebrasyon it tourism month, pila sa mga aktibidad nga andang nakalinyada hay ro pagpasakop sa Philippine Travel Mart sa maabot nga Sept 1 to 3 sa SMX convention center.
Magabo-oe suno kana it booth ro LGU-Kalibo agud nga mai-showcase ro mga tourism attraction sa banwa it Kalibo ag bilog nga probinsiya it Aklan.
Kamana man ro mga produkto kapareho it piña cloth, pasalubong ag iba pa.
May event man sigon sanda nga pagahiwaton sa Setyembre 8 sa Pook jetty port.
Raya hay pagapasakupan it mga restaurants, airline company ag maabu nga iba pa nga may kaangtanan sa industriya it turismo .
