Nagpreparar ro lokal nga gobyerno it Kalibo it nagkaeain-eain nga aktibidad para sa paaeabuton nga selebrasyon it Kapistahan ni San Juan de Bautista sa Hunyo 24.
Suno kay Carla Suñer, Executive Assistant to the Mayor it LGU-Kalibo, paga-umpisahan eon ro Kaean-an sa Kalye sa bahin it Martelino St. sa banwa umpisa Hunyo 21 hasta it 23 halin alas-4 it hapon.
Mageuwas pa kara, sa mismong adlaw it selebrasyon, may ginpreparar man sigon ro lokal nga gobyerno nga nagkaeain-eain nga aktibidad sa Pook Jetty Port kun sa siin magapatigayon sanda it Zumba ag sangkiri nga programa para nga mataw-an it kahigayunan ro mga opisyal nga mag-tao it andang tagsa ka mga mensahe.
Dugang pa kara, may mga pahampang man nga igapatigayon kapareho it Bakbakan sa Bugsayan, ag Boxing Tournament, nga makabig nga sambilog sa mga highlight it selebrasyon.
Magapatigayon man it mga parlor games para sa mga magueang ag inunga.
Paathag nana, may mga nakataeana nga opisyal sa kada pahampang para mahg-tao it impormasyon sa mga gusto nga mag-intra.
Dugang pa kara, anda eon lang nga iga-anunsyo ro iba pa nga impormasyon, kapareho it mga criteria ag qualifications para sa mga pahampang sa maabot nga mga inadlaw.
