KALIBO, Aklan—Nagpaguwa it bag-ong patakaran ro lokal nga gobyerno it Malay may kaangtanan sa pag-obra it sikat nga sandcastle sa Isla it Boracay.
Suno kay Malay Mayor Frolibar Bautista nga aprubado it Department of Environment and Natural Resources (DENR) ro andang bag-ong polisiya nga magpatuman it regulation sa sandcastle-building sa sueod it 25+5 meter easement sa bibi ag kaparte it forestland agud nga protektahan ro palibot.
Ginpamilit ni Bautista nga tuyo kara nga mapugngan ro mas pang pagkasamad it baeas it Boracay.
Nasayuran nga ro pag-obra it sand castle sa Boracay hay nagakinahangean it regulatory fee ag permit halin sa munisipyo.
Kinahangean nga ro mga naga-obra kara hay nakarehistro sa idaeum it Boracay Sandcastle Makers Association.
Dag-on 2018 kat ginpaidaeum sa an-um nga buean nga closure ro isla para sa rehabilitasyon.
Patok sa mga turista ro sandcastle sa Boracay nga nagabayad para magpalitrato bilang souvenir.
