Gindayaw ni Atty. Plaridel Morania, sangka batikang abogado sa Aklan ro mga lokal nga lideres it probinsiya sa pagpamaeabag sa Boracay Island Development Authority ukon BIDA Bill kun sa siin maagto sa national government ro pagpadaeagan sa Isla it Boracay.
Mag-eowas kara, gin-commend man ni Morania ro 19th Sangguniang Panlalawigan sa pagpasa it resolution nga gindihon ni Vice Governor Reynaldo Quimpo sa andang session ko Agosto 8 nga nagadeklara sa ap-at nga kongresista halin sa Bicol bilang “persona non grata” sa Aklan bangud sa andang kontrobersiyal nga House Bill 1085 ukon Proposing the Creation of Boracay Island Development Authority (BIDA) as a Government-Owned and Controlled Corporation (GOCC) ko Hulyo 4, 2022.
Suno kana nga maeain man kunta raya nga terminolohiya para sa nasambit nga mga mamalidha , apang gusto eamang nga ipahayag it mga local leaders ro andang sentimiento bangud sa pagpasilabot sa isla.
Dugang pa ni Morania nga ro BIDA GOCC hay may mabahoe nga epekto sa “socio-economic well-being” it mga taga-Boracay ag bilog nga probinsiya it Aklan eabi eon sa operasyon it provincial hospital kun sa siin nagabo-oe it pondo sa kita it caticlan ag cagban jetty port.
