KALIBO, Aklan—Kasunod it simbahan ag kaparian sa Aklan, nag-hinyu man ro lokal nga gobyerno it Aklan kay Pangueong Rodrigo Duterte nga ipaiway ro anang desisyon nga pasugtan ro operasyon it mga casino sa isla it Boracay.
Rraya hay kasunod it hugut nga pagpamaeabag it mga Aklanon sa sugae sa isla.
Sa sangka resolusyon nga ginpasa sa regular session ko Setyembre 27, ginpahayag it Sangguniang Panlalawigan nga ro deklarasyon it pangueo nga ginapasugtan ro casino sa Boracay hay nagresulta sa pag-ugyon it mga pumueuyu nga nagakundina sa nasambit nga tikang.
Naging inutil sigon ro gobyerno nga maka-usoy it ibang mayad nga pamaagi agud nga maka-tipon it pondo para sa nasyon nga sarang nga ika-gastos sa ginapangatubang nga pandemya.
Madumduman nga nauna eon nga ginpahayag ni Duterte ko Agosto 27 nga pagapasugtan kara ro operasyon it casino sa isla agud nga makatipon it pondo para sa pandemic response it gobyerno.
Raya hay kabaliskaran sa anang unang pahayag ko 2018 matapos nga imandu ro pagpasarado sa Boracay sa mga turista para sa paglimpyo ag rehabilitasyon.
Gintumod man it provincial board ro pag-oponer it Diocese of Kalibo sa pagpanguna ni Bishop Jose Corazon Tala-oc nga nauna eon nga nagpaguwa it pastoral letter kontra sa tanan nga porma it sugae sa probinsiya.
