KALIBO, Aklan — Sangka 64-anyos nga lolo ro nasapwan nga patay sa sueod it baeay it anang amigo sa Sitio Cagban, Brgy. Manocmanoc sa isla it Boracay, Lunes it hapon.
Nakilaea ro biktima nga si Roberto Navarro, residente it nasambit nga lugar.
Nakit-an eon lang ro biktima nga nagapungko samtang buyot ro anang tiyan nga owa eon it kabuhi ni Jodelyn Reyes sa sueod it kwarto it anang suod nga amigong si Yankee Romano.
Insigida raya nga gindaea sa Ciriaco Tirol Hospital sa isla, apang gindeklarang patay eon.
Ginasugid nga antes ro insidente hay nakaexperiensiya it pag-eain it pamatyag ro biktima.
Ginpabutyag dugang nga naga-isaehanon eang nga nagapangabuhi ro biktima sa anang baeay rason nga masami raya sa baeay it anang amigo.
Padayun pa ro imbestigasyon it mga awtoridad agud nga masayuran ro rason it kamatayan it biktima.
