KALIBO, Aklan—Nagahueat pa hasta sa makaron it guidelines ro Land Transportation Office (LTO) region VI kaangot sa pagpasugot sa angkas.
Suno kay LTO region VI spokesperson Riza Otayde, inde sigon sanda maka-aprehend makaron it mga violators hasta nga uwa it ginpaguwa nga sueondanan.
Ro klaro pa eamang sigon hay kinahang-ean nga may prototype barrier sa tunga it driver ag backrider agud nga maging libre sanda sa angkas.
Mag-eowas kara, kinahang-ean man nga nakasuksok it facemask ag helmet para proteksyunan ro andang kaugalingon.
Ginpahayag dugang ni Otayde nga may mga LGU’s nga ginapasugtan ro angkas sa andang lugar maskin uwa it naka-install nga barrier provided nga nagasunod ro mga raya sa health protocols.
Ro mga deputy officer nga makit-an sa mga nagapangunang daeanon hay nagapadumdom eamang sa mga motorista kaangot sa posibleng maging sueondanan sa angkas.
Naga-iral sigon makaron ro human consideration apang para eamang sa mga mag-asawa ukon live-in partner nga sangka baeay bangud nga may mga lugar sa nasyon nga motorsiklo ro mode of transportation.
