KALIBO, Aklan—Ro kanser sa baga ukon lung cancer hay imaw ro nagapangunang rason it pagkamatay it mga Pilipino.
Suno man sa datos, tatlo sa pueong mga Pilipino hay nagapanigarilyo, rason nga maabong naapektuhan it nasambitan nga sakit.
Maging ro mga tawong owa nagapanigarilyo hay posible man nga makaangkon it kanser sa baga.
Suno kay Dr. Glenford Refre, Internest-Pulmonologist nga ro mga nagpangunang sintomas it kanser sa baga hay haeos kapareho man sa mga sintomas it nagkaeain eain nga sakit sa baga kapareho it indi maduea-duea nga pag-ubo, pag-ubo it plemang may dugo, nalisdan sa pagginhawa, ag eubos nga pangpang-euya.
Apang kung ro kanser sa baga hay grabe eun , ro pasyente hay makitaan it mga bukoe maeapit sa abaga ag pagpanaeakit it likod.
Kung nakaekperyensiya eun it mga nagapangunang sintomas, ro pasyente hay kinahangeang magpatan-aw sa doktor agud nga maeapatan it nagakaigo nga medikasyon.
Agud nga magmayad sa kanser sa baga, ro pasyente hay puweding magpaidaeum sa operasyon, chemotherapy, ag iba pa.
Agud nga malikawan ro sakit sa baga dapat nga sundon ro mga masunod.
Indi magpanigarilyo, ugalion ro pagtakop it ilong samtang nagabiyahe ukon nagatikang, magsuksok it face mask samtang una sa guwa it baeay ukon opisina, kumaon it maabong prutas ag tinoean-on, ag mag-ehersisyo.
Kung may nabatyagang kakaiba sa pagginhawa, gilayon nga magpa-checkup sa doktor.
Ro simpleng pag-ubo hay puweding maging senyales eun it gali it kanser sa baga.
Tandaan man nga maskin makamaeatay ro nasambitan nga sakit, hay bukon man it imposibleng magmayad maghalin kara mas kapin kung gilayon nga maeapatan it nagakaigo nga medikasyon.
