Ginkontra ni Atty. Flosemir Chris Gonzales, chairperson it Regional Task Force on Ending the Local Communist Armed Conflict ukon ELCAC ro naging komento ni Mr. Kim Sin Tugna, provincial coordinator it grupong Bagong Alyansang Makabayan ukon Bayan Aklan angot sa naging “palpak” sigon nga sistema sa pagpanupod it educational assistance sa idaeom it programa it Department of Social Welfare Development ukon DSWD.
Madumduman nga ginpahayag ni Tugna nga bukon it tanan nga mga pumueoyo partikular ro mga una sa urban area hay may smartphone nga insigidang makasueod sa online registration nga ginkriar it ahensya para sa mas matawhay nga pagpanupod it assistance.
Sa pihak sigon nga ginarekognisa nanda ro programa it gobyerno apang may kakueangan gihapon ro sistema nga ginpatuman partikular sa pondo nga ginpaguwa nga bukon it bastante sa bulto it mga estudyante.
Sa pihak kara, ginpahayag ni Atty. Gonzales nga maabo ro nabuligan it nasambit nga programa rason nga inde raya mahambae nga naging palpak ag bukon man sigon it perpekto.
Sa baylo nga pasaeamatan hay anda pa nga ginausuyan it deperensya maskin ro sistema nga ginahimo it gobyerno.
Angot kara, kon sinsiro sigon ro nasambit nga grupo sa andang kawsa nga makabulig sa komunidad hay bukas ro mga taeatapan it gobyerno para collaboration it mga programa ag proyekto para sa ikamayad it komunidad.v
