KALIBO, Aklan—Nagapadayon ro maeapnagon nga protesta it mga trabahante sa nagkaeain-eain nga sektor sa pribado ag pampubliko sa United Kingdom.
Suno kay Bombo International Correspondent Ramil Isogon it London, United Kingdom nga raya hay ginakaeakipan it mga manugturo ag mga driver it tren, buses ag iba pa nga nagresulta sa pagparalisa it edukasyon ag transportasyon.
Ginpaathag ni Isogon nga pila sa mga rason it protesta hay ro pag-apela it mga raya nga pataasan ro andang sweldo bangud eon man sa nagabahoe nga gastuson kasunod it sigidas nga pagtinaas it presyo it mga baeak-eon ag serbisyo.
Suno pa kana, naka-schedule ro pagpatigayon it strike it mga nagkaeain-eain nga grupo maging ro mga abogado, fire fighters, paramedics, doctors ag iba pang health workers.
Umabot eon sigon sa 11 percent ro inflation rate sa UK, nga pinakamataas sa nakataliwan nga 40 anyos rason nga nagtuhaw ro waea-tuo nga mga hub-eag protesta.
Gina-insister it mga raya nga nagakadapat sanda nga taw-an it nagakaigong sweldo nga bastanteng magamit sa andang pang adlaw-adlaw nga kinahang-eanon.
Ginpahayag dugang ni Isogon nga nataeopangdan ro maeapnagong hub-eag protesta sa England, Scotland, London ag Wales.
Nasayuran nga kapin sa 1.6 milyong working days eon ro nauyang halin June-November 2022 bangud sa mga protesta nga kabilugang an-om nga buean ag pinakamataas sa nakataliwan nga tatlong dekada.
Ko nagtaliwan nga Nobyembre 2022, kabilugang 467,000 working days ro nauyang bangud sa pag “walkout” it mga trabahante.
