BORACAY News —- Plano makaron it mag-asawang Aubrey Miles ag Troy Montero nga mag-istar it pilang domingo sa Isla it Boracay agud nga maipakita sa andang mga unga ro kabuhi sa isla.
Suno kay Aubrey nga nabatyagan nana nga posibleng uman eon nga pagabuksan ro mga eskwelahan partikular sa Metro Manila bangud sa padayun nga pag-naba it kaso it COVID 19 rason nga makaron ro andang kahigayunan nga magbakasyon it maeawig.
Gintiempo nanda ro andang bakasyon sa Boracay makaron nga Marso kadungan sa kaadlawan ni Aubrey ag kamagueangan nga eaeaki nga si Maurice nga naga-edad eon it 20.
Sa pihak kara, ginklaru ni Troy nga posibleng abuton eamang it tatlong domingo ro andang pag-istar sa Boracay apang ro andang bagahe hay matsa maga-agto sa abroad.
Nagapati ro mag-asawa nga may matun-an ro andang bilog nga pamilya angot sa nature sa temporaryong pag-istar sa Boracay.
