Kalibo Aklan ———Sa pihak nga bukon it rekomendado para sa mga senior citizens, nagdesisyon sa gihapon ro mag-asawang parehong medical frontliner nga magpabakuna kontra sa COVID-19.
Sa ikaywang adlaw it “Resbakuna, Kasangga ng BIDA” Covid-19 vaccination para sa mga healthcare workers sa probinsiya it Aklan, nakabaton it unang dose it Sinovac ro mag-asawang Dr. Paul Macahilas, Chief of Hospital it Dr. Rafael S. Tumbukon Memorial Hospital , sangka Anesthesiologist ag Dr. Juliet Macahilas, Chief of Clinics it Panay Hospital ag sangka Internal Medicine.
Suno kay Dr. Leslie Ann Luces it Provincial Health Office (PHO) -Aklan nga maskin nga may kahigayunan sigon ro daywa nga indi magpabakuna bangud sa andang edad, apang mas ginpili nanda nga magpabakuna agud nga ipakita sa mga healthcare workers nga anumang bakuna hay eowas ag owa it dapat nga ikabaeaka.
Sa pihak nga parte, nataw-an man it unang dose it Sinovac ro sangka nurse sa DRSTMH nga cancer survivor sa sueod it haeos 15 anyos eon .
Suno kay Ms. Celina Rey, nagpangayo anay imaw it pahanugot ag otorisasyon sa anang doctor antes nga nagpabakuna.
Sa makaron hay kapin sa 500 nga healthcare workers eon ro nabakunahan sa roll out it bakuna sa Aklan kun sa siin hay nagtaeana ro Department of Health (DOH) Regional Office 6 it 2,420 vials it Sinovac.
