KALIBO, Aklan—Ginpamilit ni Malay sangguniang bayan member Alan Palma Sr., nga gina-respeto kara ro opinyon it sangka vlogger angot sa anang gina-alegar nga bukon it manami nga experiensiya sa pagbakasyon sa isla it Boracay.
Madumduman nga nag-viral ro video it magkarelasyon nga turista nga ginaeakipan it sangka pinay ag nobyo kara nga foreigner nga nagbakasyon sa Boracay, kun sa siin ginareklamo nanda ro gina-alegar nga overpriced nga gin-order nga pagkaon sa talipapa bukid ag ro pamasahe sa e-trike.
Suno kay SB Palma nga may kakueangan man ro nasambit nga mga turista bangud nga kunta antes nga nagsakay sa e-trike paagto sa andang destinasyon ag nagpa-eaha it gin-order nga mga seafoods hay nagpangutana anay it anang presyo.
Gindugang pa it opisyal nga antes nga mag-agto sa sangka lugar ro mga turista hay maghimo anay it nagakaigo nga research ag magpangutana antes nga magbo-oe it serbisyo ukon magbakae it anuman nga produkto.
Ginklaru man nana nga may nagakaigo nga taripa ro mga nagabiyahe nga e-trike nga may minimum nga 15 pesos per head, apang kon gin-arkila hay iba ro ginasukot nga pamasahe.
Nagakabaeaka si Palma nga ro nasambit nga hitabu hay makatuga it negatibong epekto sa industriya it turismo eabi eon sa mga owa pa naka-agto it Boracay.
