Nabuno ag una sa kritikal nga kondisyon ro sangka eaeaki matapos nga magresulta sa mainit nga diskusyon ro andang pag-istorya it anang manghud angot sa andang ancestral house sa Sitio Eambon, Brgy. Calangcang sa banwa it Makato.
Base sa report, bandang alas-12 it udtro adlaw it Lunes, Marso 31, una sa impluwensiya it aeak ro suspek nga si Cerio Tesoro nga nag-abot sa andang ancestral house ag nakaangkon sanda it away it anang magueang nga si Celso Tesoro. Sa pagbaeaywan ag paghaeabyan it mga gamit sa sueod it baeay hay nakabo-oe it kutsilyo ro suspek ag aksidenteng nabuno it daywang beses ro anang magueang sa anang kilid nga naging rason it pagguwa it anang internal organs.
Ginasugid nga nakaangkon it owa pagka-ilintindihan ro magmaeanghud angot sa andang ancestral house nga presenteng gina-istaran it andang ama nga magueang eon.
Insigidang gindaea ro biktima sa sangka pribadong ospital samtang ro suspek hay naaresto it mga rumespondeng kapulisan ag presenteng nakadetini sa custodial facility it makato municipal police station.
