NUMANCIA, Aklan—Ginareklamo it mga mangunguma sa banwa it Numancia ro mahina nga pagsueod ag nagapundo-pundo nga patubi it National Irrigation Administration ukon NIA.
Suno sa tagreklamo nga si Iladia Leyson it Brgy. Dongon West, Numancia nga indi haeos makaderetso sa andang pananum ro tubi bangud sa mataas nga entrada sa banwa it Malinao kamana man sa mga ginahimo nga punong it ibang mga farmers .
Naka apekto suno kana sa andang tanum nga paeay ro mahina nga tubi rason nga ginakueang.
Reklamo it iba pang mangunguma nga kapos ro tubi nga nakaka-abot kanda samtang naga-aeawas sa kaiping nga banwa .
Eubus sigon nanda nga kinahangean ro tubi makaron nga tiempo bangud nga kaabuan kanda hay naka-schedule nga mag-arado it andang kaeanasan.
Samtang, apela pa nanda sa NIA nga matambakan it baeas ro mga karsada it irrigasyon sa nasambit nga lugar bangud sa madaeum nga mga lubak.
