Bumuhos sa nagkaein-eain nga taeatapan it Department of Social Welfare and Development (DSWD) ro mga estudyante, ginikanan ag guardian para sa ayuda.
Ko sabado ro unang adlaw it distribusyon ag maabu nga Biyernes pa eang hay nakapila eon.
Grabe ro pagdueutdutan, dedma eon sa COVID-19 ag iba pang paeag sa ikamayad nga eawas.
Maskin nga nakabantay ro mga awtoridad, mataeupangdan nga palpak ro naging sistema.
Maabu ro naghambae nga kunta hay sa barangay ukon mismong eskwelahan eon lang ginpatigayon ro distribusyon.
Mas madasig nga matumod it mga opisyal it barangay ukon mga manugturo kon ro magabaton hay kuwalipikado.
Nauna eon nga gin-anunsyo nga may mabaton nga ayuda ro pigadong estudyante.
Para sa mga indigent student nga una sa elementary, makabaton sanda it P1,000 pesos, samtang P2,000 pesos man sa mga high school students, P3,000 pesos sa senior high school ag P4,000 pesos man ro mabaton nga ayuda it mga estudyante nga una sa kolehiyo.
Kinahangean eamang it mga estudyante nga magpresenta it certificate of enrollment ukon registration ag valid ID.
Makabaton it ayuda ro mga estudyanteng pigado, breadwinner, working student, ilo ukon gin-abandona it mga ginikanan, unga it solo parent ag iba pa.
Igatau ro ayuda kada Sabado hasta sa Setyembre 24.
Rason nga may kahigayunan pa ro DSWD nga bag-uhon ro sistema.
Para man sa mga benepisaryo, eubton naton it matad ro mga instructions.
Kon ginahambae nga magparehistro anay ag hueaton ro sabat kun hin-uno mabo-oe ro ayuda, raya ro obrahon.
Indi eon magdutdut sa mga naka-schedule.
Ag kon mabo-oe eon ro cash assistance, gamiton naton raya sa atong pagtu-on bangud nga raya gid man ro katuyuan kon ham-an nga nagabaton it ayuda.
