KALIBO, Aklan —- Mas mabug-at nga penalidad ro planong ipapanaog it Malay Transportation Office (MTO) para sa mga isnaberong drivers ag operators it e-trike sa Isla it Boracay.
Mag-eowas sa suspensyon, ginakonsidera man ro pagbawi it prangkisa sa mga drivers ag operators nga nagapili it pasahero eabi eon kon tatlong beses eon raya nga nadakpan.
Suno kay Ryan Tubi it MTO nga gina-isyuhan nanda it citation ticket ro mga naga-eabag sa Municipal Traffic Code agud nga matur-an it leksyon ro mga pasaway nga driver nga nakakasamad sigon sa imahe it isla.
Nasayuran nga kapin sa 28 nga reklamo ro nabaton ag insigidang gin-aksyunan it MTO kontra sa mga e-trike drivers nga kaabuan hay mga residente it Boracay.
Kasunod it pagbuhos it mga bakasyunista, mas ginapili sigon it mga drivers ro mga turista nga mahae nga magbayad it pamasahe kaysa mga residente ag mga trabahador.
Laygay pa it MTO sa mga pasahero nga insigidang isugid sa andang taeatapan ro mga abusadong drivers nga owa nagatau it maayos nga serbisyo ag convenience sa mga pasahero agud nga eagi nga maaksyunan.
Pila sa mga nabaton nga reklamo hay pagpamalibad nga maghatud sa andang destinasyon, kaskasero, naga-trip cutting, overcharging, saea nga pag-parking, loading ag unloading ag iba pa.
