KALIBO, Aklan—Nagpanawagan ro pamunuan it Banga Federation of Tricycle Operators and Driver’s Association (BAFTODA) sa mga natungdan nga ahensya it gobyerno nga taw-an it insigidang solusyon ro masami nga nagakaguba nga karsada sa bahin it Brgy. Bacan, Banga.
Suno kay BAFTODA President Raul Teodosio, maabo nga mga pothole ro nasambit nga provincial road kung siin masami man raya nga rason it mga aksidente.
Ko nagtaliwan nga buean suno kana hay may sangka pasahero it tricycle ro nahueog matapos nga eumusot ro sidewheel it behikulo sa buho.
Mabahoe sigon nga perwisyo sa parehong residente ag motorista ro masami nga pagkaguba it karsada.
Na-obserbahan sigon nanda nga kueang it reflectorized early warning device ro lugar rason nga nagiging takaw-aksidente.
Samtang, ginpasaeamat man kara ro pagbutang it iwag it barangay council bangud mabahoe raya nga bulig sa mga naga-agi nga motorista.
Nagaeaum sigon sanda nga maayos eon ro problema sa karsada para indi eon madugangan pa mga nailistang aksidente ag naduea nga kabuhi.
