KALIBO, Aklan — Malipayon nga ginbaton it mga masuwerte nga tagdaog it Swerte sa Palengke 2023, balde-baldeng pa-premyo na, may cash pa sa andang nadag-an nga premyo sa 1st weekly draw sa nasambit nga promo it Bombo Radyo ag Star FM, pinaagi sa sangka simpleng awarding ceremony sa broadcast center it Bombo Radyo Kalibo makaron nga adlaw it Lunes.
Pormal eon nga nabaton it 1st prize winner nga si Ternita De Pedro it Brgy. Talon, Altavas ro anang 5,000 pesos nga cash.
Imaw hay naggamit it proof of purchase nga Silver Swan.
Grabe man ro kalipay it 2nd prize winner nga si Merlyn Isubol it Mataphao, New Washington nga nagbaton it 4,000 pesos nga naggamit it Orocan nga proof of purchase.
Ginpahayag man it 3rd prize winner nga si Elvira Simpao it R. Roldan St. Kalibo nga mabahoe nga bulig sa andang adlaw adlaw nga kinahangeanon ro nabaton nga cash prize.
Imaw hay naggamit it proof of purchase nga Knorr Broth Cubes.
Sa pihak nga parte, naging emosyunal man ro pila sa mga consolation prize winners sa andang nabaton nga 1,000 pesos nga cash bangud nga makabig sigon nga “answered prayer” ro andang pagdaog.
Ro mga nagbaton it tig-1,000 pesos hay sanday Floramie Bingco Valencia it Poblacion, Makato; Gloria Bendoy it Aranas, Balete ag Lucy Rebutala it Polo, Banga.
Sa mga promo participants, magpadayon eang sa pagpasakup bangud malay ninyo, kamo man ro masunod nga magadaog sa Week 2 it Swerte sa Palengke promo 2023 it Bombo Radyo ag Star FM.
