Kalibo Aklan ——Nagaeaum si Terrence June Toriano, hepe it Municipal Disaster Risk and Reduction Management Office (MDRRMO) it LGU-kalibo nga magaserbing ‘eye opener’ sa mga opisyal it uniformed personnel ro kontrobersiyal nga natabu sa sangka babaye nga personnel it Bureau of Fire Protection (BFP)-Region 6 nga infected gali it coronavirus disease (COVID-19).
Suno kay Toriano nga kaeabanan nga indi makabalibad ro mga personnel kon ginasugo it andang mga superior .
Nakasentro sigon ro pagbasoe makaron kay BFP-6 Regional Director Sr. Supt. Roderick Aguto bangud sa ginatawag nga “command responsibility”.
Matsa naging kampante man sigon ro pasyente bangud sa anang pagiging asymptomatic ukon owa it anuman nga nabatyagan nga sintomas it sakit rason nga gin-eabag ro anang quarantine protocol.
Samtang, ginasugid nga ro pasyente hay naghalin sa Cebu para sa sangka training rason nga sa pagbalik sa Iloilo hay ginpaidaeum imaw sa 14 days nga quarantine ag swab testing .
Madumduman nga ginpahayag ni Malay Mayor Frolibar Bautista nga ro BFP personnel hay kaibahan sa 29 nga mga opisyal ag tawuhan it BFP halin sa Western Visayas Regional Office nga nag-agto sa Isla it Boracay.
Nag-abot sigon sanda sa Isla ko Hunyo 11 ag nag-uli ko Hunyo 14, ro adlaw man nga ginpaguwa it Department of Health ro resulta it anang COVID-19 test.
Ro insidente hay ginapatutukan makaron ni Aklan Governor Florencio Miraflores sa Provincial Health Office(PHO)Aklan .
Dismayado man ro mga opisyal sa Aklan bangud nga imbes nga taw-an it atensyon ro reopening it Isla ko Hunyo 6para sa mga regional tourist hay naging masako sanda sa pagpatigayon it contact tracing sa posibleng mga nakasalamuha it pasyente.
