NUMANCIA, Aklan—Nag-abot eon sa banwa it numancia ro mga Automated Counting Machines ukon ACMs ag iba pang election paraphernalia nga pagagamiton sa eleksyon sa Lunes, Mayo 12.
Suno kay Lorena Tumbagahan, election officer it Comelec-Numancia nga syento porsiyento eon sanda nga haum para sa pagahiwaton nga National and Local Elections.
Ro Numancia hay may kabilugan nga rehistradong botante nga naga-abot sa 26,088.
Sa 17 nga kabarangayan, ro bulwang ro may pinakamaabu nga botante nga may ap-at nga clustered precincts.
Kaibahan sigon sa paghatud it mga ACMs ro mga kapulisan agud nga masiguro nga owa it aberya ukon paeag sa seguridad sa paghatud it mga gamit para sa eleksyon.
Samtang, hin-aga nga adlaw it Miyerkules hay may pagahiwaton sanda nga final testing and sealing activity it andang mga ACMs agud nga masiguro nga ro mga igadeploy nga mga election machines sa mga polling precints hay naga-gana it maayos ag tama ro anang paghuyap it mga boto.
Apela pa ni Tumbagahan nga kalitan it mga vulnerable sectors kapareho it mga senior citizens, PWD ag mga nabdos ro kauna-unahan nga ginapatigayon nga early voting hours sa adlaw it eleksyon, kun sa siin pwede nga magboto ro mga raya it mas temprano it alas-5 hasta alas-7 it agahon agud nga indi makadungan pa sa pagdagsa it mga botante.
Mag-eowas kara, makalikaw man ro nasambit nga mga vulnerable sector sa init it paniempo.
Dugang pa nana nga balewalaon ro mga nagakalhit nga fake news makaron nga tiempo it eleksyon.
Suno kana nga dapat nga usisaon it husto ro mga impormasyon ag suk-ean ro mga makarondaya nga saea nga hilimuon.
