KALIBO, Aklan—Nagkasugot ro mga kapitan it kada barangay sa banwa it Nabas nga bawaeon ro pagpaligos sa baybayon ag kasubaan nga sakop it nasambit nga banwa kadungan it selebrasyon it kapyestahan ni San Juan de Bautista makaron nga adlaw.
Suno kay Nabas mayor James Solanoy, uwa imaw nagpaguwa it executive order bangud mismong ro mga kapitan it mga natungdan nga barangay ro nagpueong para dumilian ro andang mga pumueoyo nga magpaligos sa mga baybayon bilang kaparte eon man it nagapadayon nga measures kontra sa Covid-19.
Ginpaathag nga ro mga barangay officials ro magamonitor ag magabantay sa andang mga constituents bangud sambilog man raya sa tikang agud nga masunod ro physical distancing.
Suno pa kay mayor Solanoy, inde man gihapon makaangkon it enjoyment ro kada isaea kon may maaywanan sa tagsa nanda ka panimaeay bangud nga hugot pa sa makaron nga ginabawaean nga magguwa ro naga edad it 21 anyos panaba ag 60 anyos pataas.
Gin-engganyo man kara ro tanan nga magsunod eon lang sa ginapatuman it lokal nga gobyerno ag ipaiway ro kasadyahan para eamang makalikaw sa makataeapon nga sakit.
