KALIBO, Aklan—Nagapadayon ro pagbyahe it mga bukon it consolidated public utility vehicle sa mga nagapangunang karsadahon maskin nga natapos eon ro gintao nga Abril 30 nga deadline sa mga raya para magconsolidate sa mga kooperatiba.
Ginpaathag ni Mody Floranda, national president it Pinagkaisang Samahan ng mga Tsuper at Operator Nationwide ukon Piston nga nagpaguwa it pahayag ro Land Transportation Franchising and Regulatory Board ukon LTFRB nga inde anay sanda magpanakop it mga bukon it consolidated public utility vehikol bangud nga padaehan anay nanda it notice ukon show cause order ro mga operator it jeep nga uwa nagconsolidate agud nga magpaathag kon ham-an it inde pwede kakason ro andang franchise.
Magabuhay sa sueod it 15 diyas, antes hinyuon it Land Transportation Franchising and Regulatory Board ro bulig it Land Transportation Office ag Philippine National Police para mag-umpisa sa pagpanakop sa mga bukon it consolidated Public Utility Vehicles.
Ginklaro ni Floranda nga uwa sanda nagapamaeabag sa anumang proyekto ag programa it gobyerno para sa ikamoderno ag ikaumwad it nasyon, apang kinahang-ean nga tun-an it husto it mga law makers ro mga ginahimo nga laye partikular ro mga nakabaehag nga sueondanan.
Maabo sigon ro provision sa laye nga andang ginapaninggitan nga gusto nandang mapamatian it gobyerno agud nga makaabante ro programa nga inde sanda mawad-an it pangabuhian nga ikagutom it andang tagsa-tagsa ka pamilya.
