Hilong sa aeak ukon lango sa droga ro rason it mga makangieidlis nga aksidente sa karsada.
Kaeabanan nga nagakatabu ro aksidente sa aga-aga.
Ag kaeabanan sa aksidente hay maabung nagakamatay
Kaabuan nga nagabunggo sa poste, concrete barriers, pader ukon nagakahueog sa sa skyway, flyover ukon sa bangin.
Suno sa Land Transportation Office (LTO) makaron nga dag-on, may nailista eon sanda nga 16 nga namatay bangud sa aksidente sa karsada ag raya tanan hay bangud sa drunk driving.
Suno pa sa LTO, sa 407 nga drivers nga eakot sa aksidente, 385 sa mga raya hay napamatud-an nga hilong .
May una eon nga laye kontra sa pagmaneho it hilong , ro Republic Act 10586 ukon Anti-Drunk and Drugged Driving Act nga ginpatuman umpisa pa ko 2013.
Sa idaeum it laye, ro sin-o man nga madakpan nga nagamaneho nga una sa impluwensiya it aeak ag ginabawae nga droga hay makulong it tatlong buean ag may multa nga P80,000 pesos.
Magabug-at ro penalidad kon may una nga mahalitan ag namatay nga naga-abot sa P200,000 hasta P500,000 pesos.
May kaibahan pa raya nga mahabang pagka-kulong.
Apang sa pihak nga may una nga laye, maabu sa gihapon ro nagamaneho it hilong ag nagakatabu sa makangieidlis nga aksidente sa karsada.
Owa it nadakpan ag napenahan.
Naging dekorasyon eon lang ro RA 10586.
Matapos nga debatehan it mga mamalidha hay matsa owa man it pueos bangud nga owa ginapatuman it mga awtoridad.
Mahugod nga mag-obra it layer o mga senador ag kongresista apang owa man ginapatuman
Gina-estudyuhan it mayad ro pag-obra it laye agud nga mapuslan it publiko apang owa man it nagakatabu.
Ro pangutana, may bastante baea nga ikasarang ro mga traffic enforcers nga masayuran kon una sa impluwensiya it aeak ro driver nga eakot sa aksidente.
May una baea nga equipment ro traffic enforcers agud nga ma-detect ro level content it alcohol sa eawas.
Sa sunud-sunod nga aksidente sa karsada, dapat makaangkon it ngipon ro RA 10586.
Kun indi maipatuman, ibasura eon lang raya ag mag-usoy it ibang solusyon agud nga malikawan ro makangieidlis nga aksidente bangud sa drunk driving.
