KALIBO, Aklan—Eubus ro pasaeamat it mga kalibonhon nga naka-avail sa passport on wheels nga ginpatigayon it Department of Foreign Affairs ukon DFA Manila sandig man sa inisyatibo it lokal nga gobyerno it Kalibo.
Suno kay Sergie Tabañar, 20 -anyos, haeos sanda nga magpamilya nga ginakaeakipan it an-om ka mga indibidwal hay nag-avail gid sa nasambit nga serbisyo.
Ginpaathag nga ro anang tuyo kara hay para makaangkon it valid identification card para sa mga legal transaction sa gobyerno ag maging sa pribadong sector.
Suno kana, accessible nga mayad ro serbisyo bangud nga inde eon kinahang-ean nga mag-adto pa sa syudad it Iloilo para magproseso it dokumento rason nga uwa eon nanda ginpaeampas ro nasambit nga kahigayunan.
Nasayuran nga ro nasambit nga proyekto hay eksklusibo eamang para sa mga kalibonhon kon siin 1,800 slots ro gin-alokar it DFA Manila.
