KALIBO, Aklan–Nagbilog it pederasyon ro mga naga-alaga it baboy ag manok sa probinsiya it aklan nga gintawag nga “Federation of Livestock, Hog and Poultry Raisers Association”.
Ginpahayag it nailihir nga presidente nga si Engr. Jun Agravante nga pinaagi sa andang nabilog nga grupo hay makaangkon eon it kahigayunan nga maiplastar ro kinamatarung ag pribilehiyo it andang sektor.
Makaangkon eon sigon sanda it sambilog nga boses eabi eon ro mga hog raisers.
Naging madinaeag-on ro ginpatigayon nga general assembly it grupo matapos nga maabu sa andang mga miyembro sa kada banwa ro nagtambong.
Nasayuran nga ro kada banwa hay nagtukod it andang kanya-kanya nga asosasyon ag nag-uilihir it mga opisyales.
Suno kay Engr. Agravante nga gusto nanda nga maeansang sa 150 pesos ro minimum nga price ceiling it buhi nga baboy.
Pwede eamang sigon raya nga magtaas apang indi eon magnaba agud nga malikawan ro andang pagkalugi.
Masyado suno kana nga mahae ro production cost eabi pa ag mataas makaron ro presyo it feeds ag urok.
Ginpahayag dugang nga matapos nga magpatigayon it forum may tatlong domingo eon ro nagtaliwan hay nagtaas ro pagpamabakae it buhi nga baboy sa 145 halin sa 135 pesos.
Suno pa kana nga kon owa eagi sanda naghugpong ag naghueag hay posibleng baraton pa ro presyo sa 120 pesos.
Ro mga traders sigon ro nagadikta it presyuhanay imbes nga sandang mga hog raisers.
Sambilog pa sa andang plano pagtukod it meat shop sa kada banwa.
