KALIBO, Aklan—Nakataeana eon nga masayuran sa Hulyo 29, 2022 ro mga nagdaeaog sa ginlunsar nga contest it lokal nga gobyerno it Kalibo nga “Sustainable Home Grown Food Project, Edible Garden Contest”.
Suno kay Adorada Reynaldo, public services officer III it MEEDO Building and Maintenance Division Head it LGU-Kalibo nga umpisa ko Lunes hay nagpatigayon it final site visit and evaluation ro committee on evaluation sa pagpanguna it Department of the Interior and Local Government ukon DILG ag magatapos hin-aga nga adlaw.
Kabilugan nga 30 ro nagpasakop sa home grown gardening samtang pito eamang sa 16 nga barangay sa Kalibo sa community gardening kon sa siin ro mga participants hay ro mga Sangguniang Kabataan ukon SK.
Nasayuran nga ro mga participants hay gintaw-an it 15 nga nagkaeain-eain nga klase it libreng binhi ag garden tool sets kamana man nga ginpaidaeum sa seminar.
Gindugang pa ni Reynaldo nga may ginpahaum nga mga papremyo ro LGU sa communal garden kung siin ro 1st place hay makabaton it P20,000; 2nd place P15,000, 3rd place P10,000 ag pito ro maga-uli it tig P5,000 bilang consolation prizes ag certificate.
Samtang, sa home edible garden maga-uli ro 1st place it P10,000; 2nd place P7,000 ag 3rd place nga P5,000.
May pito man nga consolation prizes nga magabaton it tig P2,500 ag tanan hay makabaton it certificate.
May special award man nga best recycled garden project ag tiktok video challenge.
Pila sa mga participants hay naka-harvest ag nakabaligya eon it andang produkto nga ginbuligan it agricultural services division.
Tuyo it proyekto nga mapabaskog ro food security and nutrition sufficiency it banwa kamana man nga magiyahan ro mga pumueoyo sa pag-amlig sa palibot pinaagi sa tama nga pagpilak it basura.
Suporta man sigon raya sa programa it municipal solid waste management kun sa siin sambilog sa component kara hay ro paggamit it natural ukon organic nga pamaagi sa pagpatambok it tanum.
