Padayun nga naga-inabu ro mga nagaparehistro agud nga makaboto sa 2026 Barangay ag Sangguniang Kabataan Elections.
Suno kay Atty. Christian Itulid, Municipal election officer it Commission on Elections ukon Comelec-Kalibo nga umpisa Enero 20 hasta sa makaron hay naga-abot eon sa masobra sa 1,800 ro nagpa-rehistro ag ginaeauman nga maga-abot sa 2,500 hasta 3,000 sa buean it Abril.
Mas maabu sigon ro nagapa-rehistro para sa SK ukon new voter kumpara sa regular nga botante nga 18 anyos pataas.
May mga naga-apply man para sa uman nga pagpa-activate it andang boto ag mga nagapa-transfer.
Angot kara, padayun ro pag engganyo ni Atty. Itulid sa mga owa pa nakapa-rehistro nga magpasakop sa andang mga ginapatigayon nga satellite registration sa mga kabarangayan kamana man nga mag-avail sa andang Register Anywhere Program.
Padumdum nana nga ro voter registration hay magatapos eon sa Mayo 18, 2026 matapos nga raya hay gin-padayun ko Oktubre 20, 2025.
Pwede sigon nga magparehistro ro mga aplikante umpisa Lunes hasta Domingo, alas 8:00 it agahon hasta alas 5:00 it hapon, sa anuman nga satellite registration sites ukon sa andang Comelec office.
