KALIBO, Aklan–Napuno it mga Overseas Filipino Worker (OFW) ro central park it Hong Kong makaron nga adlaw it Paskwa.
Raya hay bangud natyempo ro selebrasyon sa andang day off kung siin idtu nanda napili nga mag-bonding ag magpatigayun it kasadyahan kaibahan ro iba pang kaabyaanan.
Suno kay Bombo International Correspondent Mary Lou Bautista Borra nga kaabuan kanda hay nagpahaum it nagkaeain-eain nga mga Filipino food partikular ro kakanin.
Apang, sa pihak it kasadya, eain gihapon suno kana ro espiritu it Paskwa sa Pilipinas eabi eon kung kaibahan ro pamilya.
Nagakasubo sigon imaw bangud raya ro anang ika-pitong dag-on nga pagselebrar it espesyal nga okasyon sa ibang nasyon.
Masami sigon nga nagatawag eon lang sanda sa andang mga pamilya kada may kapareho kara nga okasyon agud nga maskin paano hay mabuoe ro andang kamingaw ag kahidlaw.
