KALIBO, Aklan—Nag-umpisa eon nga mag-aeabutan ro mga nagabisita sa pantyon it andang mga nagtaliwan eon nga mahae sa kabuhi sa Kalibo Medalla Milagrosa Cemetery.
Sa pihak kara, ginpahayag it gwardiya nga si Norberto Clarite nga maeaka pa ro mga nagasueod sa nasambit nga sementeryo kun sa siin ginaeauman kara nga posibleng sa miyerkules hasta sa huwebes pa maga-aeabutan ro bulto it mga tawo antes nga igasarado raya sa oktubre 29 hasta nobyembre 2.
Mag-eowas sa mga mataeaum nga bagay, hugut man nga ginabawae ro pagbitbit it aeak ag pagpatukar it mabaskog.
Gina-inspeksyon sigon raya it mga pulis nga nakadeploy sa police assistance desk sa guwa it sementeryo.
Kapin sa 10 man sigon ro CCTV nga naka-install sa sueod it sementeryo rason nga monitor tanan ro hueag it mga tawo.
Sa pihak nga parte, ginpahayag ni Eleseo Francisco, sangka retired army ag residente it Barangay Tigayon, Kalibo nga nag-temprano imaw sa pagdu-aw sa eubnganan it anang mga ginikanan agud nga indi makisabay sa pagbuhos it mga tawo.
Bangud nga haeos 21 anyos nga owa naka-uli sa Aklan, gin-una nana nga bisitahan ro nitso it anang mga ginikanan agud nga malimpyuhan maskin nga medyu maeasa pa tuga it naexperiensiyahan nga pagbaha ko nagtaliwan nga adlaw it Sabado.
Nasayuran nga kaibahan sa kilaeang personalidad sa Aklan nga naka-eubong sa nasambit nga sementeryo hay ro pamilya Salas ag Quimpo kaibahan kara si dating Aklan Congressman Allen Salas Quimpo.
