KALIBO, Aklan—Hugut nga ginpamaeabagan it mga residente ro planong pagpatindog it crematorium facility it sangka pribadong kompanya sa likod nga porsyon it Badio Municipal Cemetery.
Suno kay Mrs. Lucy Hindrana nga eubos nandang ginkakibot ro nasambit nga balita bangud owa man nagpatigayun it information dissemination ro mga opisyal sa andang barangay angot sa proyekto.
Bangud kara, ginpakamayad sigon nanda nga mag-ugyon ag maghimo it petesiyon para ipaabot ro andang hugut nga pag-oponer.
Nagakabeaka sigon sanda para sa kaeawasan it andang pamilya engkaso nga maumpisahan ro konstruksyon it crematorium.
Mag-eowas kara hay napas-eawan man sigon ro barangay ag iba pang natungdan nga opisyal nga magpatawag it hinun-anun para sa public consultation.
Dugang pa ni Mrs. Hindrana nga sambilog imaw sa mga nagpirma sa nasambit nga petesiyon kung siin ginpalibot eon nanda ro pormas sa pilang kabarangayan.
Mag-eowas sa Barangay Badio, nakibuylog man ro mga residente maghalin sa kaeapit kara nga barangay nga ginakaeakipan it Dongon East, Poblacion ag Joyao-joyao.
Sa pihak nga parte, matapos nga mabaton ro balita angot sa planong pagtukod it crematorium, insigidang naghimo it tikang ro pilang pumueoyo agud makatipon it pwersa ag maipaabot ro andang pagpamaeabag sa proyekto.
Ginpahayag ni Mrs. Ana Mae Yacub nga sa sueod it daywa hasta tatlong adlaw nanda nga pagpalibot it petition paper hay naga-abot eon sa masobra 300 nga pirma ro andang natipon.
Ginkalipay man kara ro pagbuylog it mga residente agud mabaeabagan ro konstruksyon it pasilidad.
