KALIBO, Aklan—Matsa naging kabaean eon ro mga tricycle drivers sa sunod-sunod nga pagtaas it presyo it mga produktong petrolyo sa nasyon.
Suno kay Johnny Damian, presidente it Federation of Kalibo Tricycle Operators and Drivers Association Incorporated ukon FOKTODAI nga maskin kalbaryo kanda ro sitwasyon, apang owa sanda it mahimo.
Ginpahayag dugang nga kinahangean eon lang nanda nga maghugod sa pagbiyahe agud nga makatipon it pang-boundary ag maka-uli it bugas ag suea sa andang pamilya.
Mag-eowas suno kana nga sangkiri pa ro pasahero, dugang nga pasakit sigon sa kapareho nanda nga mga driver ro serye it pagtaas sa presyo it langis.
Nagapati man si Damian nga mabahoe nga bulig kanda engkaso nga maaprubahan eon ro ginaduso it Sangguniang Bayan it Kalibo nga madugangan it sambilog nga pasahero ro pwede nanda nga maisakay sa andang mga tricycle.
Owa man sigon sanda it plano nga magpangayo it dugang nga pamasahe bangud nga mabuhay man nga maaksyunan it natungdan.
Handum man sigon nanda nga maaprubahan ro apela it Department of Transportation ag Department of Energy sa mga kompaniya it langis nga makaangkon it subsidiya ro mga drivers sa mga pampasaherong saeakyan.
Madumduman nga sa ika-waeong sunod nga domingo, nagpatuman makaron nga adlaw it martes it dugang nga presyo sa andang produktong petrolyo ro mga kompanya it langis sa nasyon.
Sa magkaseparadong advisory, ro Caltex, Flying V, Petron, Pilipinas Shell ag Seaoil Philippines hay nagpataas sa presyo it gasolina it P1.80 kada litro, P1.50 kada litro sa diesel ag P1.30 kada litro it kerosene.
