BORACAY, Island — Inde mahueogan it dagom ro numero it mga bumuhos nga bakasyonista sa Isla it Boracay makaron nga Semana Santa.
Umpis ako Huwebes Santo hay uwa it untat ro pag-eabutan it mga turista nga nagpadayon ko Biyernes Santo hasta it Sabado de Gloria nga haeos pami-pamilya ag magbaearkada ro nag-abot para sa mahabang bakasyon.
Maabong turista ro nag-enjoy sa maanyag nga puting baeas sa Boracay ko Huwebes Santo bago ginbawaean it lokal nga gobyerno it Malay ro mga kasadyahan ko Biyernes Santo bilang kaparte it pagpamaeandong sa Semana Santa.
Mag-eowas sa mga misa sa simbahan, agaw atensyon man ro dag-unang prusisyon sa white beach ko Biyernes Santo nga kaparte eon it tradisyon sa Boracay kada Kuwaresma.
Angot kara, ginpahayag ni Kathrine Licerio, tagapaghambae it Malay Tourism Office nga ginaeauman eon nanda ro pagtaas it tourist arrivals makaron nga Holy Week bangud sa mga hotel bookings.
Makaron nga Easter Sunday hay padayon ro mga programa sa isla nga ginpahaom it mga hotels and resorts ag iba pang establisyimento.
Samtang, padayon gihapon ro mga aktibidad sa isla para sa Laboracay 2025 nga gintawag nga “Sandbox 2025” nga nag-umpisa ko Abril 15 ag magabuhay it hasta sa Mayo 4.
Raya hay summer festival nga kilaea sa makolor kara nga beach parties ag music events.
Tampok man kara ro masobra sa 25 world-class nga talento, performances, ag island vibes.
Sambilog pang event nga ginatawag LaBoracay Summer Fitness Festival 2.0 hay igapatigayon sa Boracay halin Mayo 1 hasta 3, 2025 nga nagatanyag it fitness, kasadyahan, ag tropical vibes.
