Ro nagakatabo nga shortage it asukar ag sibuyas nga puti hay kahimuan it mga tusong negosyante.
Pamatuod kara ro pagsalakay it mga tawuhan it Bureau of Customs sa mga bodega sa San Jose del Monte, Bulacan ag San Fernando, Pampanga.
Ginatago it mga tusong negosyante ro asukar sa andang mga pribadong bodega agud nga maging rason it shortage ag pagtaas it presyo.
Klaro ro pagpanabotahe it mga raya sa ekonomiya it nasyon.
Mag-euwas sa pag-angkon nanda it limpak-limpak nga salapi halin sa ginatago nga sukar, owa pa sanda nagabayad it buwis.
Kung sabagay bukon man it magiging madali sa mga tusong negosyante ro pagpagguwa it mga puslit nanda nga asukar, tinuea, mantika, bugas ag petrolyo nga nagapangunang kinahang-eanon it mga Pinoy.
May narekober nga sangka barko it asukar sa Port of Subic nga ro dukumento hay recycle permit.
Magapatigayun sigon it imbestigasyon ro mga mamalidha angot kara.
Sa makaron nakatutok ro tanaan sa daeagan it imbestigasyon it BOC sa mga natukiban nga tone-toneladang asukar sa Bulacan ag Pampanga ag ro nadiskubre ni Senator Imee Marcos nga P36 milyon nga smuggled nga puting sibuyas.
Nagakadapat nga pasabton ni Marcos ro mga korap sa BOC.
I-eakip eon man ro pag-imbestiga sa big time Customs brokers nga sangkaterba ro alalay nga mga pulis.
Sa baylo nga gamiton ro mga raya agud nga pun-an ro kakueangan it mga pulis sa pagtao it proteksyon sa mga ginagutom nga pumueoyo, ro ginaserbisyuhan nanda hay ro mga mabahoe nga tawo nga eakot sa smuggling.
