KALIBO, Aklan—Malipayon ro sangka Pilipino nga nakabase makaron sa Portugal bangud sa minilyon nga mga pamatan-on halin sa nagkaeain-eain nga nasyon ro nagtambong sa 2023 World Youth Day sa Lisbon.
Suno kay Bombo International Correspondent Rice Enalao nga manami nga kahigayunan ro event bangud nga kaabuan sa mga pamatan-on makaron hay masyadong naka-focus sa social media.
Ro event suno kana hay nagtau it tyansa sa mga pamatan-on nga maexperiensiyahan ag matun-an ro leksyon sa kabuhi ni Hesukristo.
Raya hay sangka pamaagi man agud nga mapabaskog ro pagtu-o ag relasyon kay Kristo pinaagi sa pangamuyo ag mga sakramento.
Sa pihak nga parte, ginpahayag ni Enalao nga kaibahan imaw sa kapin sa 800,000 nga mga maswerteng pilgrim nga nagtambong sa pilang aktibidad it World Youth Day kaibahan ro Santo Papa.
Raya hay ginaeakipan it pagpangamuyo sa station of the cross sa hinyu nga buksan ni Hesukrito ro bintana it kaeag ag duea-on ro mga pagkabaeaka.
Nagtambong man sigon imaw sa sangka vigil sa waterfront it Lisbon nga Parque Tejo, antes ro farewell mass it Santo Papa.
Mabahoe nga porsiyento sigon it populasyon sa Portugal hay sagrado nga Romano Katoliko rason nga makabig nga espesyal sa mga Portuguese ro event.
Madumduman nga gin umpisahan ni Pope John Paul II ro World Youth Day ko 1986 ag raya hay ginapatigayon kada tatlong dag-on.
Uman raya nga gintaeana makaron nga dag-on matapos nga mapundo bangud sa pandemya it COVID-19.
