KALIBO, Aklan—Sangka mister ro nagdayo sa probinsya it Aklan halin sa Tarlac City agud nga usuyon ro anang misis nga ginasugid nga gintanan it sangka tomboy.
Suno kay Eric Portin, 37-anyos ag sangka merchandiser nga desidido imaw nga usuyon ro anang misis nga si Arlyn Reyes nga ginasugid nga gindaea ni Bhevz Dela Cruz iya sa banwa it Kalibo.
Nag-umpisa sigon ro komunikasyon it daywa kat nagsueod ro babaye sa group chat it LGBT kon siin nagasugid raya sa anang mga problema.
Ginpahayag dugang ni Portin nga inde nana lubos maisip nga nahimo pa it anang misis nga magsunod sa tomboy ag gin-aywanan ro andang tatlong ka mga onga sa poder it anang ginikanan.
Uwa sigon imaw it matumod nga rason para aywanan it anang misis bangud nga uwa eon raya it ginaobra sa andang baeay kundi nga magkuti eamang sa ana nga cellphone.
Sa trabaho suno kana imaw kat nasayuran nga nagpanaw ro anang misis ag uwa nag-eaong kana.
Adlaw it dominggo kat nasayuran nana nga sa Aklan ro anang asawa rason nga insigida imaw nga naghimo it pamaagi para makaabot iya sa probinsya.
Angot kara, nagapanawagan raya sa may kasayuran kon siin naga-istar si Dela Cruz nga posibleng kaibahan kara ro anang misis nga si Reyes.
