KALIBO, Aklan — Nag mingku napatimprano ro street party it Ati-Atihan festival sa banwa it Kalibo sa mainit nga pagsugaeaw sa Aklanon beauty queen nga si Kathleen Sinag Paton kasunod it anang madinaeagon nga pag daug sa katatapos nga Miss Teen International 2017 sa Bangkok, Thailand.
Pasado alas-4:00 kahapon it hapon, nag landing ro anang ginsakyang eroplano sa Kalibo International Airport kun siin gin sugaeaw raya it mga staff it Provincial Tourism Office ag Sangguniang Panlalawigan nga may kanya-kanyang bitbit nga poster nga may nakabaehag it pagpanamyaw.
Maghalin sa airport, sumakay ro batang beauty queen sa gin pahaum nga saeakyan it provincial government suksok ro anang korona para sa sangka motorcade nga lumibot sa magkaeain-eain nga parte it Kalibo.
Sa sangka press conference, gin salaysay ni Paton ro anang mga naging eksperyensiya sa pagpasakop sa nasambitang beauty pageant ag kalipay nga nabatyagan matapos nga naangkon ro titueo kontra sa 15 contestants maghalin sa magkaeain-eain nga nasyun.
Gin deklara nga first ag second runner-up ro Miss Teen Brazil ag Miss Teen USA.
Si Kathleen nga gin unga sa isla it Boracay ro kamanghuran sa ap-at nga magmaeanghod it mag-asawang Roy Paton, sangka Australian national ag Luz Sinag Paton it Barangay Laserna, Nabas, Aklan.
