NUMANCIA, Aklan — Nagtililipon ro mga Muslim makaron nga adlaw it Biyernes para sa pagdumdum it Eid’l Adha ukon Festival of Sacrifice.
Suno kay Gabriel Taratanto, Imam it Muslim Community sa Brgy. Camanci Norte, Numancia nga nag-umpisa ro andang selebrasyon pinaagi sa sangka espesyal nga pangamuyo .
Ro Eid’l Adha sigon hay sambilog sa daywang pinaka-importanteng selebrasyon sa Islam, kaibahan ro Eid’l Fitr kun sa siin ginadumdum kara ro pagpasugot ni Propeta Ibrahim nga i-haead ro anang unga bilang pagsunod sa kagustuhan ni Allah.
Bangud nga obligado ro mga Muslim nga may ikasarang sa kabuhi nga magkatay it sapat, pila sa andang kaibahan hay nag-aeamutan rason kabilugan nga 10 nga kanding ag 4 nga baka ro andang ginkatay makaron nga adlaw.
Sa Pilipinas, gindeklara makaron nga adlaw nga regular holiday agud nga taw-an it daean ro selebrasyon it mga igmanghud naton nga Muslim sandig sa Republic Act No. 9849.
