KALIBO, Aklan—Sa pihak it mga ginpatuman nga restriksiyon sa Estados Unidos agud nga masuk-ean ro pinakabag-ong variant it covid-19 nga Omicron, nagapabilin nga normal ro andang pagpangabuhi.
Raya ro ginpahayag ni Bombo International Correspondent Greg Aguilar it California, USA matapos nga makalista it kaso it omicron variant sa pilang estado idtu.
Nakalista suno kana it kaso sa California, New York, Minnesota, Colorado ag Hawaii.
Owa pa man sigon raya it epekto rason nga nagapadayun ro mga mabahoe nga event sa US ag nagapabilin nga optional ro pagsuksok it face mask.
Gindugang pa ni Aguilar nga kaeabanan sa nailistang kaso hay ro delta variant.
Bangud kara, gina engganyo ni US president Joe Biden ro mga fully vaccinated individual nga magpa-booster shot bilang dugang nga proteksyon ag ro mga owa pa nakapabakuna hay magpaturok eon eabi eon ro vaccine nga Pfizer ag moderna nga ginasugid nga epekto kontra sa Omicron.
Samtang, ro mga nagabiyahe pasueod it US hay kinahangean nga magpresentar it negatibong Covid test result sang adlaw antes ro andang flight schedule.
Bawae man gihapon suno kana nga magasueod sa US ro pitong mga nasyon halin sa South Africa.
Sa pihak nga parte, gindugang pa ni aguilar nga masako makaron ro amerika sa pag-obra it bakuna nga epektibong makasukoe sa omicron apang nagakinahangean pa raya it maeawig nga tiempo.
