KALIBO, Aklan — Ginaeauman nga mas pa nga magiging grandioso ro pagpahaum it lokal nga gobyerno it Kalibo sa pagahiwaton nga selebrasyon it Chinese New Year makaron nga dag-on partikular sa ikaywang domingo it Pebrero.
Suno kay Jay-Ar Arante, head it media team it LGU Kalibo nga kapareho ko nagtaliwan nga mga dinag-on, may ginpahaum nga mga programa ag aktibidad sa pagpanguna it Kalibo Municipal Tourism Office nga magabuhay it tatlong adlaw.
Mag-eowas sa pilang mga event, uman nga igaplastar ro mga nagkaeain-eain nga Chinese cuisines sa food exhibit.
Raya tanan hay pagahiwaton sa Calle Rizal sa Barangay Poblacion, Kalibo nga kilaea bilang Chinese street bangud haeos ro mga naga-istar ag may negosyo kara hay may dugo ag lahing Chinese.
Gindugang pa nga ro dag-unan nga selebrasyon hay sandig sa ginpasa nga ordinansa agud nga ipakita ro pagkilaea sa Filipino-Chinese Community ag pagrespeto sa andang kultura ag tradisyon.
Makabig man suno kana nga ro okasyon hay sangka tourist attraction eon sa Kalibo nga ginadayo it mga bisita, kun sa siin, mabatyagan ro pagiging Chinese sa mga ginapahaum nga aktibidad ag maging sa mga ginabutang nga dekorasyon.
