KALIBO, Aklan—Owa eon nadugangan ro 3,100 liters it oily water nga nakolekta sa apektadong kaeawran nga sakop it Caluya, Antique suno sa Philippine Coast Guard ukon PCG-Western Visayas.
Suno kay Coast Guard Commander Jansen Benjamin, tagapaghambae it PCG-Region 6 nga raya hay nagakahueugan nga owa eon it may nag-abot nga bag-ong oily water halin sa nagtagas nga langis sa Oriental Mindoro.
Kapin sa 50 hasta 60 porsiyento eon nga nalimpyuhan ro apektadong lugar.
apang owa sanda nagapakampante bangud sa posibilidad it pagbuga it panibag-ong oil spill ag direksyon it hangin.
Pinaagi sa igadeploy nga robot ukon remote operated vehicle hay ma-assess ro kahimtangan it barko ag masayuran ro tikang nga paga-obrahon it mga otoridad.
Ro mga natipon nga langis hay halin sa haeos 8 kilometers nga kaeaparon it apektadong kaeawran it tatlong barangay sa lugar.
Angot kara, nagapadayun suno kana ro andang clean up operation kaibahan ro lokal nga gobyerno ag iba pang grupo.
Gindugang ni commander Benjamin nga ro ginakalisdan nanda makaron hay ro pagtransport ag disposal it mga nakolektang oily water ag iba pang debris.
Eubus sigon nanda nga ginatutukan makaron kaibahan ro iba pang natungdan nga ahensiya it gobyerno hay ro pag-preserba sa bakhawan area sa lugar.
Samtang, sangka paghinun-anon ro ginpatigayon it contractor kaibahan ro task force nga ginaeakipan it LGU, PCG, DENR, BFAR , ag DOLE kun sa siin gintalakay ro angot sa disposal, clean-up ag rehabilitation it mga apektadong lugar.
Madumduman nga nagkalhit ro langis halin sa eumugdang nga oil tanker nga MT Princess Empress sa Naujan, Oriental Mindoro matapos ro hampakon it mga mabaskog nga humbak ko Pebrero 28.
Ro Caluya hay ginaboebanta nga 70 nautical miles ukon masobra sa 129 kilometers halin sa gin-eugdangan it barko nga may kargang 800,000 litro it industrial fuel oil.
