Umabot eon sa 12 ro mga nalistang namatay bangud sa dengue nga presenteng nagaeapta makaron sa makasari-saring bahin it nasyon.
Sa sangka press conference, ginpakigbahin mismo it Philippine Red Cross nga nadugangan uman ro numero it mga namamatay tuga it peligroso nga sakit.
Suno kay Chairman Richard Gordon it Philippine Red Cross, ro makarundayang pagtaas it kaso sa dengue hay indi sigon dapat pabay’an eabi eon it publiko.
Ginpamilit nana, mageuwas sa doseng kaso it mga namatay, umabot eon man sa sobra 1,700 ro rekord it mga nagamasakit halin nga sumueod ro bag-ong dag-on.
Dugang pa kara, ginakabaeak-an ro posibilidad nga basi umabot eoman ro talaan it nasyon sa may pinakamataas nga kaso it dengue sa bilog nga kalibutan.
Samtang, kadungan it nagainabo nga kaso it mga narerekord nga nagamasakit, ginpahayag man ni Chairman Richard Gordon nga dumoble man ro demand sa dugo halin sa andang taeatapan.
Nakitaan sigon it masobra 100% nga pagtaas sa mga nagakinahangean it dugo tuga it malalang epekto it dengue sa kaeuwasan.
Bangud kara, pilang beses ron nagpaandam ro nasambit nga chairman sa publiko nga pabilinon nga malimpyo ro bilog nga palibot it baeay pati eon man ro tamang pagpilak it mga basura para mabawasan ro daeayong pag-abo pa it mga nagamasakit.
