Nag-abot eun sa 76 indibidwal ro nairepor nga namatay bangud sa pagpanaeasa it “Bagyong Agaton” samtang masobra sang dosena ro padayun nga gina-usoy ukon missing.
Raya hay sandig sa datos it National Disaster Risk Reduction Management Council (NDRRMC) makarun nga Maundy Thursday.
Kaabuan sa mga fatalities hay bangud sa natabong landslide sa pilang mga komunidad sa Eastern Visayas.
Base sa ginpaguwa nga situational report it NDRRMC, kapin sa 29 katawo ro naduea ukon missing ag waeo ro naninahan.
Nag-abot man sa kabilugang 920,727 katawo ukon kapin sa 279,557 pamilya ro apektado maghalin sa 1,296 barangays sa Bicol Region, Western Visayas, Central Visayas, Eastern Visayas, Northern Mindanao, Davao Region, Soccsksargen, Caraga, ag Bangsamoro.
Sa nasambitang numero, 162,467 individuals ukon 51,920 families ro nagapabilin sa evacuation centers samtang 41,584 individuals ukon 56,314 pamilya ro naga-istar makarun sa andang mga igbata ukon barkada.
Samtang, nag-abot man sa P134,991,740.13 ro nailistang danyos it kasamaran sa sektor it agrikultura sa Western Visayas, Eastern Visayas, Northern Mindanao, Soccsksargen, ag Bangsamoro.
Kapin sa P1,450,000 man ro estimated cost of damage sa infrastructure sa Central Visayas ag Northern Mindanao.
Kapin sa 81 roads ag pitong tulay ro bukon it passable makarun sa Western Visayas, Central Visayas, Eastern Visayas, Northern Mindanao, Davao Region, ag Caraga.
