KALIBO, Aklan—Ginpasiguro ni Punong Barangay Teodorico Teodosio Jr., it Jumarap, Banga nga paga-aksyunan ro napabalita nga pagwinarang it ayam nga bang-aw sa andang lugar.
Apang suno kana nga hasta sa makaron hay owa it may naka-abot kanda nga impormasyon angot kara.
Sa post suno kana sa social media it sangka netizen, ginpahayag kara nga sangka bang-aw nga ayam ro nagalinibot sa andang barangay ag nagapang-angkit it mga tiyo man it ayam nga namatay.
Naga-abot eon sigon sa daywang tiyo it ayam ro anang ha-angkit.
Bangud kara, ginpaandaman ni kapitan Teodosio ro publiko eabi eon ro mga inunga nga naga-agto sa eskwelahan nga magdahan kontra sa naga-gala nga peligroso nga ayam.
Partikular nga naga-gala sigon ro nasambit nga sapat sa sektor 3 maeapit sa dating bueangan.
Magadeploy suno kana imaw it anang mga barangay tanod agud nga ma-monitor ro nasambit nga ayam.
Naghinyu man sigon imaw kato sa Municipal Agriculture Office nga mataw-an it regular nga anti-rabies vaccine ro mga ayam eabi pa ag kaeabanan nga nagataas ro kaso it rabies kon mainit ro tiempo, apang kueang ro supply.
Nagapati man si kapitan teodosio nga asong gala ro nagapang-atake nga bang-aw ag hanaeang eamang sa andang lugar.
Nagpanawagan man imaw sa mga may alagang ayam nga maging responsabli nga pet owner agud nga malikawan nga makahalit sa iba bangud nga raya hay may saeabton sa laye.
