KALIBO, Aklan — Bangud sa sangag it stereo, sangka radio reporter ro gin eabo it makapilang beses it naakig nga kaeapitbaeay nga igkampod sa Sitio Laguna, Brgy. Cayangwan, Makato, Aklan.
Gin kilaea ro biktimang si Rolly Herrera, 63, radio reporter it sangka FM radio station ag residente it nasambitang lugar.
Insigida rayang gin padangat sa Aklan Provincial Hospital bangud sa igu it pag eabo sa anang abaga, likod, tangkugo ag siko.
Samtang, naaresto man it mga rumespondeng pulis ro suspek nga si Jerevic Temple, 29, residente man it nasambitang lugar.
Suno sa biktimang si Herrera, alas-7:00 it gabie samtang naga sinadya ag nagapamati it music sa andang stereo kaibahan ro iba pang mga paryenti sa compound it andang baeay hay insigida sigon nga sumalakay ro iritableng suspek ag gin sita sanda nga naga disturbo ag masyadong mabaskog ro andang gina patukar.
Owa man it natabong diskusyon sa tunga it mag igkampod kat gulpi eon lang nga magbo-oe it sanduko ro suspek ag gin eabo si Herrera samtang nakatalikod.
Gina pahaum eon ro kasong frustrated murder nga iga pasaka it biktima kontra sa suspek.
